Ginkumpirma sang Western Visayas Transport Cooperative nga magakuha sila sang units sang e-jeep kun mangin available na ini sa Iloilo.
May kaangtanan ini sang ginlunsar ni former Ilocos Sur Governor Chavit Singson nga e-jeep initiative sa Iloilo nga nagapakilala sang mga electric jeepneys sa mga transport cooperative kag mga korporasyon nga interesado sa pag-angkon sang mga yunit.
Kabahin sang inisyatibo amo ang magpautang sa mga driver ukon operators sang electric jeepneys nga wala sang interes kag wala man sang down payment.
Sa interview sang Bombo Radyo kay Mr. Raymundo Boyet Parcon, Chairman sang Western Visayas Transport Cooperative, iya ginpahayag nga dako ini nga bulig sa mga kooperatiba agud indi na kinahanglan nga mangutang para sa inisyal nga bayad agud maka-purchase sang unit.
Apang suno kay Parcon, kinahanglan anay nga mangin klaro sa ila ang mangin sistema agud nga mangin talunsay ang pagpatuman sini nga inisyatibo.
Pahayag niya, isa sa mayor nga elemento nga ila dapat preparahan kag plastaron amo ang pagpahamtang sang charging stations para sa mga electric jeepneys.
Pahayag niya, kinahanglan mangin maayo man ang maplastar nga kasugtanan sa tungaay sang kita kag ang pagbayad agud indi man mabudlayan ang mga kooperatiba.
