Ginbawian gid sang kabuhi ang mag-iloy nga pasahero sang tricycle matapos nga nabungguan sang isa ka kotse ang ila ginasakyan nga tricycle sa national highway sang Barangay, Bitoon Ilaya, Cuartero, Capiz.
Ang mag-iloy amo sanday alyas Ivy, 20-anyos, kag anak sini nga si alyas Chalea.
Ang driver naman sang tricycle amo si alyas Leomar, 22-anyos kag live-in partner sang iloy nga biktima.
Lunsay mga residente sang Barangay, Bitoon, Ilaya, Cuartero, Capiz ang mga ini.
Ang driver naman sang salakyan nga nakabunggo sa tricycle amo si alyas Clyde, 24-anyos, residente sang President Roxas, Capiz apang nagatinir subong sa Iloilo City.
Ang driver sang isa pa ka salakyan nga ginpahayag nga nakalasak sa mag-iloy amo si alyas Ben, 46-anyos, isa ka negosyante kag residente sang Brgy. Mongpong, Roxas City.
Sa inisyal nga impormasyon nga nakuha sang Bombo Radyo nagikan sa Cuartero MPS, ginapahayag nga samtang ginasubay sang driver sang tricycle ang dalanon halin sa banwa sang Dumarao, aksidente ini nga na-sideswipe sang amo nga salakyan samtang ginasubay man ang kasubong nga direksyon sang dalanon rason nga naglapaw ini sa pihak nga bahin.
Bangud sa mabaskog nga impact, nag-apok sa pihak nga linyada sang dalanon si Ivy kag aksidente man nga nabungguan sang isa man ka salakyan nga ginamaneho ni alyas Ben.
Nag-angkon sang pilas sa lawas ang mag-iloy nga gilayon naman nga ginrespondehan sang Cuartero Emergency Response Unit kag ginpadangat sa Dao District Hospital para kuntani sa nagakaigo nga pagbulong apang wala nagdugay ginbawian ang mga ini sang kabuhi.
