Liwat nga ginpabakod sang North Atlantic Treaty Organization members ang suporta para sa Ukraine sa isa ka pagsinapol kaupod ang mga opisyal sang pungsod bilang sabat sa paglunsar sang Russia sang experimental intermediate-range ballistic missile sang damlag lang.
Ini matapos nagpatawag ang Kyiv sang meeting sa NATO-Ukraine Council.
Sa amo nga pagsinapol, ginplastar sang chief of the defense intelligence sang Ukraine kag acting commander sang air force sa mga kaalyado nga pungsod ang detalye sang pagpang-atake kag ang possible nga konsekwensya.
Suno sa NATO, ang pagpang-atake nga nag-target sa Dnipro, ang isa ka pagtuyo sang Russia nga i- terrorize ang mga sibilyan sa Ukraine kag pahugon ang mga tawo nga nagasuporta sa Ukraine sa pagdepensa sini sa iya kaugalingon batok sa giyera nga ginlunsar sang Russia.
Matandaan nga ginpahayag ni Russian President Vladimir Putin nga gin-igo sang Moscow ang isa ka Ukrainian military facility paagi sa bag-o nga intermediate-range, hypersonic ballistic missile bilang sabat sa pagpahanugot sang U.S. kag UK sa Kyiv nga atakehon ang Russian territory gamit ang advanced Western weapons.
