Nakalusot si South Korean President Yoon Suk Yeol sa impeachment matapos gin-boycott sang ruling party ang pagbinotohay apisar sang mga protesta sa guwa sang parliament.
Ini nga binotohay sa impeachment ang natabo bangud sa gulpyada nga pagdeklarar ni Yoon sang martial law, ginsuspinde ang civilian rule, kag nagpadala sang tropa sa parliament.
Apang sunod man nga ginbawi ang amo nga deklarasyon kag nag-U-turn ang mga hitabo bangud sa lapnagon nga mga protesta kag pagpamatok sang lawmakers.
Ang partido sang oposisyon amo ang nagduso sang impeachment nga nagakinahanglan sang two thirds majority para makapasar.
Apang napalpak ini bangud halos tanan sa People Power Party (PPP) ni Yoon ang nag-walk out kag wala nagboto. Base sa partido sang presidente, balabagan nila ang impeachment para nga malikawan ang paglala sang gamo. Ginpasalig nila nga resolbahon ang krisis sa South Korea sa mas responsible kag mas malinong nga paagi.
Nahibaluan nga samtang gina-istoryahan ang impeachment, may mga nagaprotesta sa guwa sang parliament nga nagadangat sa 150,000 suno sa data sang pulis kag 1-million naman kun basehan ang data sang organizers.
