Pagbukas sang Ungka flyover sa full capacity, Christmas gift sang DPWH sa mga motorista
𝗜𝗟𝗢𝗜𝗟𝗢 𝗖𝗜𝗧𝗬 – Buksan na sa Disyembre 25, 2024 ang kontrobersyal nga Ungka flyover.
Sa interview sang Bombo Radyo kay Engr. Sanny Boy Oropel, regional director of the Department of Public Works and Highways-Region 6 (DPWH-6), iya ginpahayag nga full capacity ang pagbukas sa flyover sa diin tanan nga lanes ang mahimo na nga maagyan.
Suno kay Oropel, kakason naman ang vertical limit sa flyover.
Apang indi sa gihapon pagpasugtan ang mga truck kag motorsiklo nga maglabay sa flyover.
Samtang, ang pagbutang sang aspalto sa idalom sang flyover ang ipalagas lang sa tion nga indi ini mahingagaw sa Disyembre 25.
Magluwas sa rectification works, nag-request man ang Metro Pacific Iloilo Water agud nga mag-ilis sang ila nga pipeline sa idalom sang flyover.
Nahibaluan nga ang gasto sang gobyerno sa Ungka flyover ang nagdangat na sa P975 million halin sa original budget nga P680 million bangud sa ginapatigayon nga pagkaayo.Ceres bus
Ang contractor sang proyekto nga nagalaba sang 453.7 meters amo ang International Builders Corporation kag amo man sa gihapon ang nagdaog bilang contractor sa ikaduha nga phase sa pagkay-o sang flyover.
Katuyuan sini kuntani nga mapahagan-hagan ang trapiko sa intersection sang Sen. Benigno Aquino Jr. Avenue kag President Corazon Aquino Avenue nga nagakonekta sa Barangay Ungka, Jaro, Iloilo City padulong sa Barangay Ungka 2, Pavia, Iloilo, apang naghatag ini sang huol sa publiko bangud sa palpak nga proyekto.
