Mahimo nga mahulog sa otitis media ukon middle ear infection ang common cold nga mabatyagan sang mga kabataan subong nga holiday season nga malamig ang panahon.
Sa interview sang Bombo Radyo kay Dr. Philip Ian Padilla, Assistant to the Director sang Philippine Genome Center, iya ginpahayag nga ang otitis media ukon ang middle ear infection ang prone sa mga bata, ilabi na ang naga-edad sang anom ka bulan tubtob isa ka tuig kag duha ka tuig.
Suno kay Padilla, ang mga bata ang naga-bottle feeding ang prone man sa amo nga balatian bangud sa mas mahina pa ang ila nga system nga pakigbato-an ang nasambit nga sakit.
Ginakabig man sini nga mas madasig mag-angkon sang otitis media ang mga bata nga wala naka-breast feed.
Kon masarangan, kinahanglan nga i-breast feed ang mga bata agud nga mas mapabaskog ang ila immune system.
Nagaumpisa naman ang sakit paagi sa mga symptom nga sip-on kon sa diin, posible ini makalaton sa kapareho man nga bata paagi sa mucous nga nagaguwa halin sa bata nga may middle ear infection.
Nagpanugyan man ang natungdan sa mga ginikanan nga gilayon hatagan sang antibiotics ang bata nga makitaan sang sintomas agud nga malikawan nga maglapta kag makalaton.
