Ginkumpirma sang Iloilo Provincial Health Office (IPHO) nga ang kadam-an sa mga kaso sang leptospirosis sa probinsya sang Iloilo amo ang naangot sa pagpanguma ukon pag-ubog sa talamnan.
Sa interview sang Bombo Radyo kay Dr. Rodney Labis, ang Chief sang Health Service Delivery Division sang amo nga talatapan, iya ginpahayag nga ini ang rason kun ngaa gina-involve gid ang mga mangunguma sa ila kampanya.
Suno sa iya, ginakabig ang mga mangunguma nga “high-risk” nga populasyon sa amo sini nga balatian.
Ang masunod nga nagapanguna nga rason suno kay Labis amo ang pag-ubog sa tubig-baha.
Sa record sang opisina, 99 na ang mga kaso sang amo nga balatian subong nga tuig kag 12 ang nagkalamatay.
Sa sini nga mga kaso, nagapanguna ang Dumangas nga may walo; Oton kag Tigbauan nga may tag-anum; Janiuay, Sta. Barbara, kag Tubungan nga may tag-lima; kag Passi, Dingle, Pototan, kag Zarraga nga may tag-apat.
Napagkit naman ang casualties sa Dumangas, Oton, Zarraga, Barotac Nuevo, Barotac Viejo, San Dionisio, San Joaquin, kag Concepion nga may tag-isa, kag Duenas kag Dingle nga may tag-duha.
Nagpahanumdom ang opisina nga mas delikado sa amo nga balatian ang may mga samad ukon pilas nga mahimo sudlan sang kagaw.
Kun indi gid malikawan ang pag-ubog sa tubig kaangay sa talamnan, ginapanugyan suno kay Labis ang pagsuksok sang botas kag pagpanghugas sang habon pagkatapos.
Ginapangabay man ang pagpakonsulta sa doktor matapos ang exposure sa kontaminado nga tubig ukon duta agud nga mahatagan gilayon sang bulong.
Ang leptospirosis ang tuga sang bacteria leptospira nga mahimo maglapta paagi sa direkta nga pagkontak sa ihi sang mga sapat nga may impeksyon, pareho sang ilaga kag baboy ukon sa urine-contaminated environment kaangay sang tubig-baha.#
