May isa ka lalaki nga nangin adik sa pagsugal kag adik sa pagpamakal bangud lamang sa iya gin-inom nga bulong.
Ini amo si Philip Stevens, 66, isa ka Briton.
Nagasuprer si Philip sang restless leg syndrome gani nga ginresetahan siya sang doctor sang Ropinirole nga isa ka dopamine antagonist medication.
Gin-inom man sini ang bulong apang wala siya napaandaman sang posible nga side effects kaangay sang impulse control disorder.
Suno sa natungdan, antes pa man ang iya medication, gina-enjoy na sini daan ang pagkadto sa karerahay sang mga kabayo apang mahinalungon gid siya sa iya mga taya.
Apang nanotisyaran sini nga sang nag-inom siya sang bulong, indi na sini makontrol ang iya kaugalingon.
Masami na ini nga nagataya gamit ang iya nga smartphone kag nagabugtaw pa siya bisan gab-i para lang nga maplastar kun pila kag kun kay sin-o siya magataya.
Magluwas diri, wala tuo man ang iya nga shopping sa mga panapton kag mga fishing equipment nga tuman pa ka mahal.
Apat ka tuig ang iya medikasyon kag apat ka tuig man nga nagpanglakaak ang iya gasto sa online gambling websites.
Sang ulihi, kasunod sang abiso sang isa ka doctor, gin-untatan sini ang pag-inom sang bulong.
Nag-untat man ang iya nga compulsive behaviours apang bangud wala sang nabaton nga advice nga amat-amaton lang ang pag-untat sa iya nga medication, nagsuprer man siya sang seryoso nga withdrawal symptoms.
Lakip diri ang paranoia. Hamakon mo nga nagalalain ang iya mga bata bangud ginakumbinse niya ang mga ini nga magpaidalom sa DNA tests bangud kumbinsido gid siya kuno nga indi siya ang ila nga amay!
Sang gindangop na ang kaso sa abogado, na-istoryahan ang financial settlement.
Ginhatagan si Philip sang masobra P5-million apang wala gid nag-ako ang doctor nga siya ang may sala sa amo nga hitabo sa pasyente.
Nagpahayag naman ang mga abogado ni Philip nga kuntani magaserbe ini nga importante nga leksyon sa masunod nga mga kaso nga dapat mapahibalo gid sa pasyente ang tanan nga impormasyon nga kinahanglan mahibaluan kaangot sa possible nga side effects sang bulong nga ila ginatumar.
