Linibo ka South Koreans ang nagselebrar sa Seoul matapos nga opisyal nga nagboto ang parliament agud i-impeach si President Yoon Suk Yeol.
Ini kasunod sang hinali nga deklarasyon ni Yool sang martial law sang nagligad nga semana nga gilayon man niya nga ginbawi bangud sa pagpamatok sang lawmkers kag pagprotesta sang mga tawo.
Kabug-usan nga 204 ang nagboto pabor sa motion nga i-impeach si Yoon samtang 85 naman ang nagpamatok.
Opisyal na subong nga gin-suspend si Yoon sa iya nga official duties samtang nagaserbe naman bilang acting president si Prime Minister Han Duck-soo.
Nagakinahanglan ang constitutional court sang anum ka bulan agud maka-desisyon kun i-sustain ang impeachment batok sa president. Kun makumpirma, siya ang ikaduha nga South Korean president nga pormal nga kakason sa opisina kasunod sang kaangay man nga impeachment kay Park Geun-hye nga amo ang una nga female leader sang amo nga pungsod.
Matandaan nga sang nagligad nga semana, una na nga nagtilaw ang opposition parties nga i-impeach si Yoon apang nakaluwas ini matapos nga gin-boycott sang ruling party nga People Power Party ang binotohay sa parliament.
Ang nagapungko subong nga acting president ang gina-imbestigaran man sa papel sini sa desisyon sang presidente sa pagdeklarar sang martial law gani indi pa sigurado kun ano ang mangin dalagan sang mga hitabo.
“At times like this, more than ever, we must prioritise national security,” pahayag sang acting president sa una nga national security meeting. “I feel a heavy sense of responsibility in this difficult national situation.”
Sa pihak nga bahin, ginpahayag naman sang US nga mabakod ang ila alyansa sang South Korea apisar sang nagakatabo subong sa Seoul.
Suno kay US ambassador to South Korea Philip Goldberg, suportahan sang US ang South kag magapabilin ang democratic and constitutional process para sa ila nga mga pumuluyo. Mayor nga kaalyado sang US ang South Korea sa Asya kag nagabuligay sila sa away sang Seoul batok sa North Korea.
