Apisar wala pa nakumpleto ang imbestigasyon sa natabo nga pagtibusok sang eroplano sang Azerbaijan Airlines, may sources na nga nagapahayag nga ang Russia ang may kahimuan sini.
Base sa nagaguwa nga mga impormasyon, nag-crash ang amo nga eroplano kag ginkamatay sang 38 ka mga tawo matapos gin-igu sang Russian air defense system.
Base sa footage sang nabilin nga parte sang eroplano, may mga buho ang eroplano — baliskad sa una naguwa nga impormasyon nga bird strike ang posible rason sang insidente.
Base sa preliminary results sang imbestigasyon, ang nag-igu sa aircraft amo ang Russian Pantsir-S air defense system, kag naparalisa man ang communications sini paagi sa electronic warfare systems samtang nagahilapit ini sa airport sa Grozny.
Matandaan nga nag-crash ang Azerbaijan Airlines flight J2-8243 malapit sa syudad sang Aktau sa Kazakhstan matapos ini nag-divert halin sa area sang Russia kun sa diin nagagamit ang Moscow sang air defense systems batok sa Ukrainian drone strikes.
Una na nagpaguwa sang statement ang Russian government nga likawan ang pagpakot-pakot samtang wala pa natapos ang imbestigasyon.
Gina-uyatan subong sang Kazakh authorities ang flight data recorder kag padayon nga ginatun-an agud mahibaluan kun ano gid ang rason sang trahedya.
