‘Unbothered’ ang ginbansagan nga Pambansang Ginoo nga si David Licauco sa latest showbiz happenings.
Sa iya latest Instagram photo, simple nga black shirt kag shorts ang suksok sini kag madamo ang naham-ot sa iya caption nga “Chill lang.”
Wala sang context sa caption sini apang may nagasunlog sa iya kaangay sang ‘Pulang Araw’ co-star sini nga si Derrick Monasterio nga nakahibalo siya kun ano ang buot silingon ni David: “Alam ko na to haha.”
Indi abi malikawan sang fans nga mamensyonar ang pangalan ni David sa online discussions kasunod sang pag-anunsyo ni Barbie Forteza nga bulagay na sila sang iya long-time boyfriend nga si Jak Roberto.
Wala sang ginhatag nga rason si Barbie kag wala man gihapon sang komento si Jak tubtub subong.
Madumduman nga sang Disyembre, nahinambit naman ni David sa isa ka livestream sa iya bag-o nga coffee business nga single siya subong kag magapangita sang bag-o nga girlfriend.
Bisan pa sang tion nga magkarelasyon pa sanday Barbie kag Jak, kilala na ang chemistry sang BarDa ukon ang Barbie Forteza kag David Licauco tandem sa 2022 historical series nga Maria Clara at Ibarra tubtub sa Maging Sino Ka Man, Pulang Araw, kag That Kind of Love.
