Kilalahon naton subong ang bag-o nga naga-uyat sang record bilang pinakatigulang nga tawo sa bilog nga kalibutan.
Ini matapos napatay na ang nauna nga nagapanag-iya sang record nga amo ang 116-anyos nga si Tomiko Itooka sang Japan.
Ang bag-o nga record-holder amo si Inah Canabarro Lucas sang Brazil nga naga-edad sang 116 years kag 210 days sang ginkilala ini sang Guinness World Records.
Si Sister Inah man ang pinakatigulang nga madre sa kalibutan nga nabun-ag sang June 8, 1908 sa Sao Francisco de Assis sa Rio Grande do Sul, Brazil. Nabun-ag siya bilang tuman ka niwang nga bata kag gindumdom sang iban nga indi na siya maka-survive kun maka-edad-edad na.
Apang malawig pa ang iya nangin kabuhi kag nangin kabahin dira ang iya pagka-madre.
Nagsaylo siya anay sa Montevideo, Uruguay sang nagpanumpa na nga mangin madre sang December 1928.
Sang 1930, nagbalik siya sa Brazil kag nangin manunudlo sang Portuguese kag mathematics sa eskwelahan sa Tijuca, Rio de Janeiro. Naglawig sang dinekada ang iya teaching career nga amo man ang nagdala sa iya sa lain-lain nga mga lokasyon.
Sa iya ika-110 nga kaadlawan sang 2018, nakabaton siya sang apostolic blessing halin kay Pope Francis.
Si Sister Inah amo ang ginasiling nga last living person nga nabun-ag sang 1908 kag isa sa tatlo na lamang ka mga tawo nga nabun-ag sang 1900s nga subong nagakabuhi pa.
