Tuman gid ang aton paghalong sa aton nga ngipon, kag amo man ina nga paghalong ang kinahanglan kun ikaw naka-pustiso.
Pat-od nga indi mo gid gusto nga maabtan mo ang natabo sa isa ka Lolo sa Peru.
Ini isa ka 81-anyos nga tigulang nga nakabatyag sang kabudlay sa pagtulon kag masakit man pati ang iya pagginhawa sa sulod na sang apat ka adlaw.
Bangud indi na ini makaagwanta, nagpalapit ini sa ospital, kag sang nagpaidalom sa X-ray, tuman ang iya kakibot sang nahibal-an nga nagbara gali ang pustiso sa iya nga tutunlan.
Nahibaluan nga may epilepsy man si Lolo.
Gin-istorya sini nga sang gin-atake siya sang kumbulsyon, ginpinsar niya nga nabuga niya ang iya pustiso kag na-missing, apang wala gid siya nagpinsar nga natulon niya gali ini.
Madasig naman ang medical team sa Sabogal hospital sa Lima sa pagpatigayon sang operasyon.
“During a convulsive episode in Huacho on December 13, 2024, he expelled a dental prosthesis – that’s what the patient thought. But what really happened was that he had ingested this foreign body, it had remained in the hypopharynx,” suno sa report ni Dr. Raul Maurta sang Sabogal Hospital.
Nakuha gikan sa iya tutunlan ang pustiso, kag tuman ang kalipay sang Lolo bangud mahapos na liwat kag indi na masakit ang iya pagginhawa. Naka-guwa naman si Lolo sa ospital matapos ang madinalag-on nga procedure.
