Ang pagpalangga sang isa ka iloy amo ang isa ka sahi sang pagpalangga nga indi gid naton pag-ibaylo sa iban.
Amo ina ang kinaandan para sa aton nga mga tawo, apang may isa ka istorya sa Turkey nga nagapamatuod nga amo man ina nga klase sang pagpalangga ang sarang mahatag sang sapat.
Sa isa ka veterinary clinic, nakuhaan gid sang CCTV camera ang isa ka heartwarming story sang isa ka layaw nga ido.
Natabo ini sa Adnan Kahveci neighborhood sang Beylikduzu sa probinsya sang Istanbul.
Suno sa clinic, sang nagligad lamang nga adlaw, may yara sang animal lover nga nagdangop sa ila agud dal-on ang isa ka tutoy nga nakit-an sini sa dalan. Suno sa nagdala, amo lang ini isa ang buhi pa kag gusto niya nga mabuligan ini sang veterinarian.
Amo na lang ang kakibot sang mga tawo didto bangud dugay-dugay, ara na ang iloy sang tutoy, kag wala ini naga-isahanon. Dala sini paagi sa iya baba ang isa ka tutoy nga halos wala na nagahulag.
Suno sa technician, na-notice nila kun daw ano ka desperada ang ido nga madala ang iya bata sa clinic.
Natukiban sang vet nga naga-suprer na gali ang puppy sang hypothermia kag tuman na gid ka nubo ang heart rate.
Base pa sa surveillance footage, makit-an gid kun ano ka worried ang iloy nga ido bangud naga-sunod-sunod ini sa staff sa clinic kag ginalantaw gid sila samtang ginatatap nila ang tutoy.
Sa maayo nga palad, naluwas sang team ang little puppy kag ang bilog nga pamilya sang ido ang naga-recover na subong sa amo nga clinic.
Indi bastante ang gatas sang iloy para sa iya mga tutoy gani nga naggamit ang clinic sang formula para nga maluwas ang iya duha ka babies.
Nagdesisyon man ang clinic nga indi anay sila magbaton sang bisita para nga makapahuway sang maayo ang mother dog kag iya kabataan.
Ginpahayag sang doctor nga madamo gid ang na-intriga sa istorya sang ido kag nakita gid nila kun ano ini kaalam kag caring nga klase sang sapat.
