Agaw-atensyon ang mag-utod nga Yulo nga sanday Carlos kag Karl Eldrew sa ginapatigayon nga awards night sang Philippine Sportswriters Association (PSA) kagab-i, Enero 28.
Si Carlos Edriel ukon si Caloy amo ang ginhingadlan nga Athlete of the Year kasunod sang maragtason nga duha ka bulawan nga medalya nga iya nabulsa gikan sa Paris Olympics sang Agusto 2024.
Ang pagpangibabaw ni Caloy sa men’s floor exercise kag vault amo ang naghatag sang pinasahi nga dungog sa Pilipinas sa ika-100 nga tuig sini nga pagpasakop sa Olympiada.
Ang manghod naman sini nga si Karl Eldrew ang nakabaton sang special citation in gymnastics particular ang Tony Siddayao Award.
Isa ka rising gymnast kag Palarong Pambansa multi-medalist si Eldrew nga sa bata nga edad nagahimo naman sang kaugalingon nga pangalan sa sports. Sang Disyembre, naubos sini ang walo tanan ka gold medals sa Hong Kong Artistic Gymnastics International Invitational Championships.
Gindominar sang 16-anyos nga Yulo ang junior division sang nangibabaw ini sa individual all-around, floor exercise, vault, parallel bars, horizontal bar, pommel horse, kag still rings, kag lakip man sa nakakuha sang gold sa team all-around event.
Madamo ang nagdayaw sa duha ilabi na sa ila paghaksanay sa awards night kag pag-upod sa interviews apisar sang kontrobersiya anay nga nagputos sa ila pamilya nga ginkaulamiran sang iloy nga si Angelica Yulo kag nobya ni Caloy nga si Chloe.
Sanday Carlos kag Karl Eldrew ang ginalantaw man nga dungan nga maga-tiglawas sang Pilipinas sa Olympics sa 2028 nga pagahiwaton sa Los Angeles, California, USA.#
Photo by: Jun Mendoza
