Pangunahan sang mag-utod nga Carlos kag Eldrew Yulo ang Philippine gymnastics team sa 2026 Asian Games nga pagahiwaton sa masunod nga bulan.
Upod sang mag-utod sa men’s artistic gymnastics squad sanday Juancho Miguel Besana, Justin Ace De Leon kag Zachary Cortins Nuñez.
Sa women’s artistic gymnastics naman, pangunahan ang koponan sang Olympian nga si Levi Ruivivar, upod sanday Kylee Kvamme, Chiara Dawn Andrew, Lauren Supnet kag Haylee Garcia.
Kabahin man sang Philippine delegation ang rhythmic gymnasts nga sanday Breanna Labadan kag Jasmine Althea Ramilo, pati na ang trampoline standouts nga sanday Jerry Ilano Jr. kag Janine Padilla Luvicar.
Target ni Carlos Yulo nga makadala sang mga medalya para sa Pilipinas matapos nga wala siya nakapasakop sa 2022 Asian Games sa Hangzhou, China bangud nga nagdungan ini sa iya pagpartisipar sa world championships nga isa ka Olympic qualifier.
Pagkatapos sini, nakakuha si Carlos sang kwalipikasyon para sa Olympics kag nakadaog sang duha ka gold medal sa floor exercise kag vault.
Ginalauman nga gamiton niya ang iya eksperyensya sa sini nga kompetisyon sa iya pagsabak sa Asian Games.
Samtang, nagalaum man ang 18-anyos nga si Eldrew nga mapadayon ang iya maayo nga momentum matapos makakuha sang bronze medal sa floor exercise sa Asian Men’s Artistic Gymnastics sa China sang Hunyo.
Sa junior level, nakakuha na si Eldrew sang isa ka gold kag duha ka silver medal sa vault sa nagkalain-lain nga edisyon sang Asian championships.
Nakakuha man siya sang bronze medal sa floor exercise kag horizontal bar sa Junior World Championships sang nagligad nga tuig.
Sa women’s gymnastics naman, ginalauman nga daku ang papel ni Ruivivar matapos magpa-opera sa iya tuo nga tiil ang iya kaangay nga Olympian nga si Emma Malabuyo sini lang nga bulan.
