Nag-abante sa tatlo ka apparatus finals kag team event si two-time Olympic gold medalist Carlos Yulo sa men’s artistic gymnastics sang 2026 Asian Games sa Japan.
Maga-compete si Yulo sa floor exercise kag vault finals nga amo ang mga kategorya kun sa diin siya nakakuha sang gold medals sa Paris Olympics. Magluwas diri, qualified man siya sa finals sang parallel bars.
Nanguna si Carlos sa floor exercise matapos makakuha sang score nga 14.600; nag-qualify man siya sa parallel bars bilang ika-anum nga may 14.266 puntos; apang ika-pito lamang sa vault nga may 13.649 puntos matapos nga natumba siya sa iya una nga landing attempt.
Suno kay Carlos, indi amo sa iya ginapaabot ang iya preparasyon, apang madamo siya sang natun-an nga madala niya sa masunod nga mga adlaw.
Samtang, nag-qualify man ang manghod niya nga si Karl Eldrew sa floor exercise kag horizontal bar finals pati na sa team event.
Nangin pinakamataas nga all-around scorer sang Pilipinas si Karl Eldrew matapos makakuha sang 77.264 puntos kag magranggo nga ika-pito overall kag una sa ila subdivision.
Ika-apat naman si Karl Eldrew sa floor exercise nga may 13.966 puntos kag ika-siyam sa horizontal bar nga may 13.433 puntos.
Ginpahayag ni Carlos nga proud siya sa iya manghod kag gin-ako nga indi niya matupungan ang ginahimo ni Karl Eldrew sa high bar.
Maga-compete man si Miguel Besana sa vault final matapos magranggo ika-apat nga may 13.933 puntos. Siya ang gold medalist sa amo nga event sa 2023 SEA Games.
Ang Team Philippines, nga ginabug-usan man nanday Zachary Nunez kag Ace de Leon, magapuntariya sang medalya sa team event matapos mag-qualify sa ika-anom nga pwesto nga may 232.093 puntos.
Natalana ang men’s team final sa Setyembre 23, samtang ang floor exercise final sa Setyembre 24. Ang vault, horizontal bar kag parallel bars finals naman matabo sa Setyembre 25.#
