Duha na ang kumpirmado nga patay sa natabo nga pagbungguanay sang taxi kag bus sang Calinog Bus Line (CBL) sa Barangay Bolong Este, Sta. Barbara, Iloilo.
Ini ang base sa impormasyon nga nakuha sang Bombo Radyo sa Western Visayas Sanitarium and General Hospital kun sa diin gindala ang mga biktima.
Sa interview sang Bombo Radyo kay Haydee Dela Cruz, punong barangay sang nasambit nga lugar, iya ginpahayag nga madasig ang pagpadalagan sang taxi rason nga nakabunggo ini sa likod sang CBL nga naga U-turn kuntani.
Sa pihak nga karsada naman, makit-an nga nagapadulong man ang depampasahero nga jeep sang Janiuay sa siyudad sang Iloilo nga may dala nga mga pasahero lakip na ang nagakabit sa likod sang jeep.
Sa pagbunggo sang taxi sa likod sang CBL,bangud sa impact natulod niya ini pauna kag nadalasa sang CBL ang Janiuay nga jeep kag didto na nagtabog ang nagakabit nga pasahero gintunaan man sang iya kamatayon.
Base sa impormasyon, ang driver sang bus amo si Agusto Latoza, 49-anyos kag residente sang Brgy. Caninguan, Lambunao.
Samtang, ang driver naman sang jeep amo si Ryan Bandiola, 38-anyos, residente sang Brgy. Danao, City Proper.
Ang driver sang taxi amo si Jomar Senerado nga nadugayan makuha sa iya salakyan matapos nga nawasak gid ang unahan sang iya taxi nga ginamaneho.
Sa subong, padayon pa ang imbestigasyon sang Sta. Barbara MPS natuhoy sa amo nga aksidente.
Padayon naman nga ginabulong sa ospital ang iban pa nga mga indibidwal nga nasamaran.
