Nagapangatubang sang reklamo kag indi hamak nga pagpakamalaot ang isa ka babaye matapos natukiban nga ginkumbinse sini ang iya bana nga magbaligya sang iya kidney.
Ini nga kaso natabo sa West Bengal nga isa ka state sa India.
Base sa imbestigasyon, ginpilit sang asawa ang bana nga ibaligya ang organ sa black market para nga may kuwarta sila nga mapa-eskwela ang ila bata nga babaye kag ma-arrange ang kasal sini sa may kuwarta nga lalaki.
Bisan nga nagduha-duha pa ang bana sang una, dalayon gid ini nga nakumbinse sang ulihi bangud ginpaminsar man sini nga ang iya pagsakrpisyo ang mahimo mangin solusyon sa ila kapigaduhon kag mahatagan pa sang mayo nga buwasdamlag ang iya bata.
Isa ka tuig ini nga nagpangita sang buyer sa black market bangud iligal ang pagbaligya sang human organs sa India sa sulod na sang masobra tatlo ka dekada.
Nakakita gid man siya sang manugbakal sang ulihi, nagpaidalom sa operasyon, kag nabaton ang kuwarta nga $11,500 ukon masobra P672,000 bilang balor sang iya organ.
Gintugyan ini ang kuwarta sa iya asawa, apang sang ulihi, magluwas nga masakit ang operasyon nga iya gin-agyan, mas nagsakit pa gid ang iya dughan sa natukiban.
Ini bangud sang nabaton sang asawa ang kuwarta, gingamit niya ini agud mag-elope sa iya nga lover.
Natukiban sang bana nga may nakilala gali ang iya asawa nga isa ka lalaki halin sa Barrackpore nga isa man ka syudad sa India.
Nagluyagay sila sa Facebook, kag bangud nagdalom ang ila relasyon, nahuman ang desisyon sang asawa nga bayaan ang iya pamilya, apang antes sina, ginpuga niya anay ang bana nga magbaligya sang kidney agud nga may kuwarta siya nga dal-on sa iya pagseparar sa ila.
Nag-file sang reklamo ang bana sa local police kag sunod nga natultulan ang asawa nga didto sa Barrackpore.
Ginsulong pa sang bana, bata, kag ugangan ang balay nga ginapuy-an sang asawa apang wala na ini nag-atubang sa ila.
Ang lover pa sini ang nagpalab-ot sang desisyon nga maga-file ini sang divorce bangud kuno sa physical and mental abuse nga ginahimo sang iya mga ugangan sa sulod sang 16 ka tuig nga kasado siya sa iya bana.
Ginapadayon sang West Bengal Police ang imbestigasyon sa amo nga kaso kag ginabasehan man ang complaint kag video footage sang interaksyon sa tunga sang alleged lover kag pamilya sang bana.
