Gin-ako ni Iloilo 5th District Rep. Raul Tupas nga ginlauman sang halos tanan nga mga mamalidha sa kamara nga talupangdon gilayon sang Senado ang impeachment ni Vice President Sara Duterte.
Ini matapos nga natigayon kahapon nga ma-impeach sang lower chamber sang kongreso si Duterte kag sunod nga gin-transmit sa Senado ang Articles of Impeachment.
Sa pag-adjourn naman sang session sang Senado antes alas syete kagab-i , wala gin-istoryahan ang articles of impeachment batok sa Vice President.
Sa interview sang Bombo Radyo kay Iloilo 5th District Rep. Tupas, iya ginpahayag nga base sa konstitusyon, kinahanglan kuntani nga maghulag gilayon ang Senado sa amo nga impeachment proceeding.
Suno kay Tupas, bangud nga wala pa ini ginsapak sang Senado, ila ginalantaw nga posible nga hulagon ini sang upper chamber sang kongreso sa tion sang campaign period antes ang eleksyon ukon sa pag-convene na liwat sang kongreso sa Hunyo 2.
Gindugang man ni Tupas nga posible man nga wala ini gintandog sang Senado bangud nga ila ginalantaw nga may epekto ini sa ila kandidatura ilabi na ang mga reelectionist sa ila makuha nga boto sa Mindanao nga amo ang baluarte ni Duterte.
Nahibaluan nga tanan nga mga kongresista sa Iloilo ang nagpirma sa impeachment.
Ini amo sanday Iloilo 1st District Representative Janet Garin, 2nd District Rep. Michael Gorriceta, 3rd District Rep. Lorenz Defensor, 4th District Rep. Ferj Biron, 5th District Rep. Raul Tupas, Iloilo City Rep. Julienne Baronda, USWAG Party-list Rep. Jojo Ang, Kabataan Party-list Rep. Raoul Manuel, kag AAMBIS-Owa Party-list Rep. Lex Colada.
