Nagnubo ang numero sang mga Pinoy nga malipayon pa sa ila nga love life sandig sa resulta sang Fourth Quarter 2024 Social Weather Survey sang Social Weather Stations (SWS).
Suno sa survey, 46% na lang sang mga Pilipino ang “very happy” sa love life nga amo ang pinakamanubo sa sulod sang duha ka dekada.
Pahayag pa sang report, 12 points ini nga mas manubo sa 58% nga na-rekord sang Disyembre 2023. Patas naman ini sa 46 percent nga na-rekord sa amo man nga survey sang 2004.
Sa pihak nga bahin, 36 percent sang respondents ang nagsiling nga “could be happier” pa ang ila love life, mas mataas sa 23 percent sang December 2023.
Ang mga wala naman sang love life ang nagnubo man sa 18% halin sa 19% sang nagligad nga tuig.
Base pa sa sini nga survey, ang pinaka-common nga love language sa mga Pinoy amo ang Acts of Service nga may 67%. Lakip diri ang pagluto sa pagkaon para sa pinalangga, paghimo sang trabaho para sa ila, pagbulig sa iban pa nga mga ulubrahon, kag kaangay man sa pagpanghimos kag pagmato-mato sa sulod sang balay.
Ang iban pa nga nga nagapanguna nga love language amo ang Words of affirmation (51%), Quality time (51%), Giving gifts (33%), kag Physical touch (29%).#
