Kun amo sini nga mga tion nga malapit na lang i-selebrar ang Valentine’s Day, feel na feel mo gid kun in love ikaw. Tyempo man ini nga feel na feel mo gid ang heartbreak kun binayaan ikaw ukon nag-break kamo sang imo nga karelasyon.
Amo gid sini ang nabatyagan sang 32-anyos nga si Dawn Cuenzo Salmo rason nga nanghagad siya sang iya mga abyan kag nagkadto sa campsite sa Tanay, Rizal.
Samtang yara didto, ginsulit na lang sini ang iya bayad kag ginpaguwa ang ya kaugot paagi sa pagsinggit sa kabukiran.
Wala siya naghaum nga ang amo nga pagpautwas amo pa gid ang magadul-ong sa iya sang isa pa gid ka sakit.
Nagguwa ang isa ka lalaki nga campsite staffer, ginhambalan sila nga maghimos kag maghalin, kag ginkumpronta man si Salmo kun ngaa nagsinggit ini kag nagpamuyayaw.
Sang nagsabat siya nga ang bukid ang iya ginbuyayaw, hinali siya nga gintapungol sa nawong.
Nagsinggitan ang mga abyan ni Salmo, ginkwestyon ini sa iya pagpanakit, tubtub nga na-umpawan na si Salmo, nagbalos sa pagsumbag sa staffer, kag nagsinggitanay.
Nagapanindugan gid si Salmo nga ang bukid lang ang iya ginbuyayaw.
Nag-explain man ini nga nagbayad man siya para nga makatinir sa campsite pero ginsakit pa siya sang staffer.
Nagrason naman ang staffer sa pulis nga alas sais pa lang sa aga sang amo nga tion kag madamo pa nga campers ang nagakatulog kag nagaka-disturbo sa ginhimo ni Salmo.
Arestado na ang staffer, naka-detain sa Tanay Police Station, kag mangatubang sang reklamo nga slight physical injury.
Nagpangayo naman sang pasaylo ang management sang campsite, kag nagpasalig nga magahimo sila sang tikang agud nga indi na masulit pa ang amo nga insidente.#
