Wala sang katupong nga pagpasalamat sa Diyos ang ginhimo sang mga alumni sang Central Philippine University (CPU) matapos nalakip sa mga topnotchers sa February 2025 Respiratory Therapists Licensure Examination.
Patas sa Rank 5 sanday Jose Miguel Santisteban Dumat-ol sang Miagao, Iloilo kag Jywelle Nae Leonero Nacional sang Sultan Kudarat nga may 91.75 percent.
Samtang, pareho naman nga Rank 6 sanday Di-Anne-Mei Quiñones Evangelista sang Mandurriao, Iloilo City kag Charisse Joy Ponte Rubino sang Kalibo, Aklan nga nakakuha sang 91.50 percent.
Nalab-ot naman sang CPU ang 97.30% nga passing rate matapos 36 sa 37 ka examinees halin sa unibersidad ang nakapasar sa pasinawan.
Nahibaluan nga sa 1,097 examinees 853 ang nakapasar ang pasinawan.
Sa interview sang Bombo Radyo kay Santisteban, iya ginpahayag nga sang Senior High School ini, nagdesisyon ini nga magkuha sang nasambit nga kurso matapos ang ila immersion.
Apisar indi ini ang iya una nga napilian nga kurso, apang natun-an naman niya ini nga palanggaon sa diin nagbunga sang matam-is ang iya pagtuon.
Samtang suno naman kay Nacional, nangin dako man nga pagpahangkat sa ila pagtuon ang pandemya.
Apang sa pihak sini, nagtutok ini sa iya handom nga mangin Respiratory Therapist.
Para naman kay Evangelista, makabig man nga survival of the fittest ang ila kurso sa diin sang 1st year masobra sila sa 40, apang masobra na lang sa 30 sa ila ang naka-graduate.
Ginpahayag sini nga indi mahapos ang ila kurso bangud nakasandig sa ila ang kabuhi sang tawo ilabi na nga nakatutok sila sa Respiratory.
Ginpakigbahin naman ni Rubino nga ang iya inspirasyon sa iya pagtuon amo ang iya hinuptanan nga ido.
Suno kay Rubino, nangin dako man nga bulig sa ila pag-review amo nga isa lang sila ka section sa diin nangin mahapos ang ila pagbuligay sa pagtuon.
