Kun bata pa kita, naga-amat-amat pa lang kita sa pagtuon kun paano magkinot, gani natural nga wala ginatugyan sa aton ang dalagku nga kantidad. Ang aton nanay kag tatay amo ang nagatago sini tubtub sa tiyempo nga kabalo na kita kun paano mag-manage sang aton galastuhon.
Apang may isa ka bata nga nainit gid sang ginkuha sang iya tatay ang iya kuwarta nga nabaton niya kadungan sang holidays.
Isa abi ka tradisyon sa China kag ginahimo naman diri sa Pilipinas kag sa iban pa nga Asian countries nga sa tion sang Chinese New Year, may ginahatag nga red envelop nga ginatawag man nga money card ukon ampao sa mga kabataan.
May sulod ini nga kuwarta, gani nga sa Chinese family, masami nga ang ginikanan anay ang nagatago sang monetary gifts para sa ila nga bata.
Apang may isa ka bata nga lalaki sa amo nga pungsod nga indi kuntento sa arrangement nga ang iya tatay ang matago sang kuwarta, gani ang iya gin-obra, nagtawag ini sang pulis.
Nabaton sang police station sa Lanzhou, Gansu province ang tawag halin sa bata nga nagapanugid nga may bad guy kuno sa ila nga balay, kag ginkawat sini ang iya kuwarta.
Nabatian pa sang pulis nga may nagsinggit sa bata nga nagasaway sa iya kun ngaa nagtawag ini sa police station, gani nag-responde sila para ma-verify ang reklamo.
Tuman ang kalipay sang bata sang nakit-an sini ang iya mga uncle police nga nag-abot — baliskad sa iya tatay nga tuman ang kahuya sa sitwasyon.
Nag-insister ang bata nga bad person ang iya tatay, apang nagpaathag naman ang amay nga wala lang nakahangop ang iya bata gani nga nagtawag ini sang pulis bangud indi ini magpasugot nga ang amay lang anay ang matago sang kuwarta.
Mismo ang cellphone pa gali sang tatay ang gingamit sang bata sang nagtawag ini sa mga pulis.
Nagbulig naman ang mga pulis sa pag-settle sa problema paagi sa pagpaathag sa bata nga ang tatay gid man ang dapat nga magtago sang kuwarta, kag kun may kinahanglan ini baklon, mahimo lang siya makapangayo.
Ginpanugyan man sa amay nga tudluan ang iya bata sa mga patakaran sa kuwarta, kag klaruhon gid sa iya ang arrangement antes ini kuhaon kag taguon.
