Napasaka na sa Department of Justice (DOJ) ang reklamo batok kay anay Presidente Rodrigo Duterte kaangot sa pahayag sini sang nagligad nga semana nga pangpatyon ang 15 ka mga senador agud nga makapwesto ang mga kandidato nga iya nga gina-endorso.
Suno kay Criminal Investigation and Detection Group (CIDG) chief Police Brigadier General Nicolas Torre III, ang iya nga gin-file nga complaint para sa case build-up amo ang unlawful utterances kag inciting to sedition.
Bisan pa nga nagdepensa ang mga kaalyado ni Duterte nga joke lamang sang former president ang amo nga pahayag, nagsabat naman si Torre nga “Bagong Pilipinas” na subong kag indi pwede ini nga mga statement nga ipaguwa nga lahog-lahog lamang.
Indi man ini isyu sa pulitika suno kay Torre, bangud maathag nga ginlapas ni Duterte ang laye.
“Alam niyo bagong Pilipinas na, eh. Hindi na pwede ‘yung mga gano’ng statements na kinabukasan joke only na lang,” suno kay Torre. “Hanggang ngayon ba naman dadalhin natin ang gulo na ‘yan na puro patay-patay na lang? Tapos if they will be taken on their word, bigla na lang sasabihin na joke only. Or ang latest naman na palusot is he’s only expressing a legal opinion,” dugang sini.
Matandaan nga gin-himo ni Duterte ang statement sa proclamation rally sang Partido Demokratiko Pilipino Laban (PDP-Laban) sang nagligad nga semana.
“Patayin natin ‘yung mga senador ngayon para mabakante. Kung makapatay tayo ng mga 15 na senador, pasok na tayong lahat… Talking of opportunities, the only way to do it is pasabugin na lang natin,” pahayag sang anay punong ehekutibo.
Ini nga statement ang ginbalusan man ni President Ferdinand Marcos, Jr. sang nagpangampanya naman ang iya alyansa sa Davao del Norte sang Sabado sang hapon.
Antes ang lihok ni Torre, may mga mamalidha man nga nagpanawagan sa National Bureau of Investigation (NBI) nga imbestigaran ang joke sang former president.
Matandaan nga sang nagligad nga semana, may gin-file man ang NBI nga reklamo nga inciting to sedition kag grave threats batok sa bata ni former President Duterte nga si Vice-President Sara Duterte-Carpio.
Ini kaangot naman sa iya pamahog nga patyon sanday President Ferdinand R. Marcos, Jr., iya asawa nga si Liza, kag si House Speaker Martin Romualdez pananglitan may magpatay man sa iya.
