Gin-athag sang Division Head sang Child and Youth Welfare Development Program nga may naka-schedule na nga daan nga activities ang mga day care centers sa syudad kag wala ini ginhungod agud magdungan sa pagpanagtag ni Iloilo City Lone District Representative Julienne Baronda sang pagkaon sa mga kabataan, kahapon, Pebrero 19.
Ini matapos ginkatingala ni Rep. Baronda kun ngaa halos sang wala klase sa mga day care centers sa adlaw mismo nga siya ang nanghatag sang packed meals sa mga bata bilang kabahin sang selebrasyon sang iya kaadlawan.
Sa interview sang Bombo Radyo kay Mary Grace Centino, iya ginpahayag nga wala sang suspension sang klase, sa baylo, nag- shift lang sa modular mode rason nga wala sa centers ang mga bata.
Suno kay Centino, sa pagkamatuod, madamo sang aktibidad kahapon kun sa diin involved gid ang mga day care workers rason nga wala lang anay ginpabalik ang mga bata.
Dugang niya, may yara man sila sang emergency meeting.
Suno pa sa natungdan, wala man sila makahibalo nga makadto sanday Baronda bangud una bes, wala man sang koordinasyon sa ila ang kampo sang mamalidha.
Namalibad naman ini nga magkomento sa isyu nga posible may yara gid man san pulitika sa likod sang natabo.
