Ginkalipay ni Iloilo City Mayor Jerry Treñas ang nangin resulta sa gin-file niya nga cyber libel batok kay Iloilo Provincial Information and Community Affairs Officer Nereo Lujan.
Sa interview sang Bombo Radyo kay Treñas, iya ginpahayag nga maayo man nga nakapyansa gilayon si Lujan agud man makapadayon siya sang iya facebook posting kag makapadayon man ang alkalde pasaka sang dugang nga kaso.
Suno kay Treñas, nagahulat lang man ang ila kampo sang mahimo idugang nga post ni Lujan agud mapasakaan sang kaso.
Handa man ang alkalde sa dugang nga mga facebook posting ni Lujan.
Kon balikan, nagpaguwa sang resolution sang Iloilo City Prosecutor’s Office nga nakitaan nila sang malisya ang tatlo ka mga posts ni Lujan.
Una na nga nagpasaka sang 12 counts sang cyber libel si Treñas batok kay Lujan, kon sa diin, sa subong nakitaan ang tatlo sang grounds agud padayunon ang kaso.
Nahibaluan nga nagabalor sang ₱48,000 ang piyansa sa kada count sang cyber libel case sa diin may kabug-usan nga ₱144,000 ang ginbaydan ni Lujan.
