Kun mag-graduate ikaw nga ‘with honors’, siyempre, malipay ka gid bangud bugal mo gid ini kag bunga sang imo pinangabudlayan bilang estudyante.
May isa ka babaye sa Connecticut, USA nga ginhatagan sini nga pagkilala, kag sa baylo nga malipay, ginkasuhan sini ang iya eskwelahan.
Istorya ini ni Aleysha Ortiz, 19, nga nabun-ag sa Puerto Rico kag nag-eskwela sa Hartford Public High School sa Hartford, Connecticut.
Suno kay Aleysia, bata pa lang siya, nabudlayan na siya sa pagtuon, kag nagpadayon ini bisan nga nagsaylo na sila sa United States.
Ginsiling sini nga indi basta-basta ang iya kondisyon bangud haluson siya gani maka-uyat sang lapis, kag ang iya pangbasa ang daw kaangay sa mga kabataan sa Grade 1. Pag-abot sa high school, may yara sang special teacher nga gin-assign sa iya special case apang wala man ini sang binuligan suno kay Aleysha.
Sang isa ka bulan na lang ang nabilin antes ang graduation sang Hunyo, nag-conduct na gid man ang teacher sang dugang nga test nga amo ang iya ginahingyo, kag didto nareyalisar niya nga virtually illiterate man siya gihapon.
Suno pa kay Aleysha, gintanyagan siya sang school district officials nga makabaton siya sang graduation diploma kabaylo sang intensive services, apang ginbalibaran niya ini.
Apang naka-graduate siya gihapon sa high school nga with honors nga nagakahulugan nga nagdemonstar siya sang academic excellence.
Nakakuha pa siya sang college scholarship, apang gindayon gid ni Aleysha ang pagkaso sa iya eskwelahan sa bangud sa negligent infliction of emotional distress.
Gin-ako man ni Aleysha nga bisan indi siya makahibalo magbasa kag magsulat, naka-pasar lamang siya kag nakasulod pa sa University of Connecticut bangud sa bulig sang moderno nga mga application. Gingamit sini ang smartphone apps para nga ma-translate ang mga nakasulat sa speech, kag ang speech naman ginahimo niya nga text paagi sa amo nga application. Amo man ini ang iya gingamit sa pag-fill out sang college application kag sa essay.
Apang bangud lain na ang setup sa kolehiyo, nabudlayan gid si Aleysha kag nag-untat na sang Pebrero para sa mental health treatment.
Ginsiling sini nga dayunon niya ang kaso sa iya former school bangud gusto niya nga mangin accountable sila sa iya eksperyensya, ilabi na bangud daw kaangay nga ginkawatan siya sang edukasyon bangud wala sang labot ang institusyon sa iya.
