Nagapati ang isa ka human rights lawyer nga puro nga taktika lamang ang ginbuy-an nga mga tinaga ni former Secretary Salvador Medialdea sa courtroom sang International Criminal Court.
Si Medialdea ang nagpungko bilang tiglawas ni anay Presidente Rodrigo Duterte sa pagsugod sang initial hearing sang ICC Pre-Trial Chamber 1 kun sa diin nagtambong sa proceedings si Duterte paagi sa video link.
Sa interview sang Bombo Radyo kay Atty. Jobert Pahilga, iya ginpahayag nga gin-gamit ni Medialdea ang oportunidad nga kuhaon ang simpatiya sang publiko para sa anay presidente.
Suno kay Pahilga, luyag pagwaon ni Medialdea nga iligal ang pag-aresto kag pagdala sa anay president sa Netherlands, kag makaluluoy ang sitwasyon sini bangud sa iya nga edad.
Suno pa sa iya, makatilingala man nga ginmitlang ni Medialdea nga mahina ang palamatin-an kag indi na maathag ang panan-awan sang anay punong ehekutibo.
Dugang niya, ang pahayag ni Medialdea ang wala nagakabagay sa pagsugod pa lang sang initial hearing sa trial ni Duterte.
