Ginpunto ni Akbayan Party-list Representative Percival “Percy” Cendaña nga may limitasyon dapat ang Filipino hospitality ukon pagka-maabi-abihon sang mga Pilipino, ilabi na kon ginaabusaran ini sang mga dumuluong.
Sa interview sang Bombo Radyo, ginsiling ni Cendaña nga indi buot silingon nga bangod maabi-abihon ang mga Pilipino sa mga dumuluong, pabay-an na lamang sang pungsod ang bisan ano nga pagpahog ukon pagpamigos.
Suno sa mamalidha, kinahanglan ipakita sang Pilipinas ang integridad, kaisog kag kalig-on sa pag-atubang sa ginapahayag nga mga pagpamahog sang Chinese Embassy kag ni Chinese Ambassador Jing Quan.
Ginpaathag man ni Cendaña nga suno sa Vienna Convention on Diplomatic Relations, may kinamatarong ang isa ka pungsod nga nagabaton sang diplomat nga ideklara ini nga persona non grata, ukon indi na pagbatunon sa amo nga pungsod.
Paagi sini, mahimo hingyuon sang Pilipinas ang China nga papaulion ang ambassador sini.
Dugang ni Cendaña, ang panawagan nga ideklara nga persona non grata si Jing Quan ang isa ka tikang sa idalom sang diplomasya agud ipahayag ang pagkondenar sang Pilipinas sa pamahog nga ginahimo sang mga dumuluong.
