Ginhangkat sang Chinese Embassy ang mga senador kag kongresista nga ideklara nga persona non grata si Chinese Ambassador Jing Quan.
Kasunod ini sang mga kritisismo sa pahayag ni Jing nga mahapos lang nga mapierde sang China ang Pilipinas kun mag-gamit sila sang pwersa.
Ginkondenar ini sang pila ka opisyal sang gobyerno sang Pilipinas kag gintawag nga isa ka pagpamahog.
Sa isa ka post, nagpahayag naman ang Chinese Embassy nga kun seryoso gid man ang mga mamalidha sa ila ginaplano nga tikang, dapat ipatuman na lang nila ini.
Nag-init man ang pagbinayluhay sang mga pahayag sa tunga sang embahada kag ni Philippine Coast Guard spokesperson Commodore Jay Tarriela matapos magbina-isay ang duha kun sin-o ang nanguna sa pagpamahog.
Samtang, ginkondenar man sang Department of Foreign Affairs kag Department of National Defense ang pahayag ni Quan.
Nahibaluan nga nagapadayon ang tensyon sa tunga sang Pilipinas kag China bangod sa pag-angkon sang duha ka pungsod sa West Philippine Sea apisar pa nga ang 2016 arbitral ruling nagdesisyon nga iya sang Pilipinas ang nasambit nga kadagatan.
Ginakabig naman ni Defense Secretary Gilberto Teodoro Jr. nga isa ka pamahog nga nagatuyo nga mag-intimidate sa mga Pilipino ang komento sang Chinese envoy.
