Ginkumpirma sang aktres nga si Carla Abellana nga nagtaliwan na ang iya Lola nga isa ka beterana nga aktres nga si Delia Razon.
Ang aktres nga kilala off-screen bilang si Lucy May G. Reyes ang ginbawian sang kabuhi sa edad nga 94-anyos.
Base sa mga detalye nga gin-share ni Carla sang ginkumpirma sini ang masubo nga balita, nabun-ag si Delia sang Agusto 8, 1930 kag napatay naman sang Marso 15, 2025.
Prominente siya nga indibidwal sa Philippine cinema, kag kilala sa iya performances sa classic films.
Nangin kabahin siya sang pila ka iconic movies lakip ang Awit ng Bulag (1948), Gitano (1949), Mutya ng Pasig (1950), Florante at Laura (1950), Prinsipe Amante (1950) bilang si Prinsesa Elena kag ang sequel sini nga Prinsipe Amante sa Rubitanya (1951).
Sa Luksang Tagumpay, na-nominate siya bilang Best Actress sa 1957 FAMAS Awards.
Lakip naman sa iya pinakaulihi nga mga proyekto amo ang teleserye nga Tayong Dalawa sang 2009, kag ang pelikula nga Buenavista (Ang Kasaysayan ng Lucena) sang 2010.
Ginhatag man sa iya ang FAMAS Lifetime Achievement Award sang 2009.
