Gin-rekomendar sang International Olympic Committee (IOC) executive board nga ilakip ang boxing sa Los Angeles 2028 Summer Olympics.
Sang nagligad nga bulan, matandaan nga nag-grant man ang committee sang provisional recognition sa World Boxing nga isa ka daku nga tikang para dalayon nga malakip ang boxing sa sports events sa masunod nga Olympiada.
Suno kay IOC president Thomas Bach, kinahanglan pa nga ipaagi sa session sa Greece subong nga semana ang opisyal nga pag-apruba sini, apang suno sa iya, kampante siya nga makuha sang World Boxing ang approval.
Matandaan nga sa Paris 2024 Games, ang IOC ang nagpanguna sa boxing competition matapos ginkakasan na sang pagkilala ang International Boxing Association sang 2023 bangud napaslawan nga maghimo sang reporma sa governance and finance.
Popular ang boxing sa mga kumpetisyon sa Olympics, kag isa man ini sa mga sports nga naga-excel ang Pilipinas.
Sang 2024, duha ka Pinay boxers ang nagdala-pauli sang bronze medals halin sa Paris nga amo nanday Nesthy Petecio kag Aira Villegas. Ikaduha na ini nga Olympic medal ni Petecio matapos nadag-an ang silver sa Japan sang 2021.
