Ginkondenar ni Datu Odin Sinsuat, Maguindanao del Norte Mayor Datu Lester Sinsuat ang pag-ambush sa ila election officer kag sa bana sini sang wala pa nakilala nga mga armado nga suspek sa Barangay Makir sa nasambit nga banwa.
Sa amo nga insidente, patay si Maceda Lidasan Abo, Election Officer sang Datu Odin Sinsuat, kag pilason naman ang bana sini nga si Jojo Abo.
Padulong ang mag-asawa sa Dalican Election Offic sakay sang ila SUV sang ginluthang sang wala pa matumod nga mga suspek.
Padayon naman ang imbestigasyon sang mga otoridad agud matumod ang motibo sa krimen kag makilala ang mga yara sa likod sang pag-ambush.
Ginkumpirma naman ni Maguindanao del Norte Provincial Election Supervisor Atty. Nabil Mutia ang pagtaliwan ni Maceda Abo, samtang nagapaayo naman sa ospital ang iya bana.
Bangud sa hitabo, ginrekomendar ni Commission on Elections (COMELEC) Chairman George Erwin Garcia nga ipaidalom sa COMELEC Control ang Datu Odin Sinsuat agud masigurado ang seguridad kag malikawan ang paglala sang sitwasyon.
