ILOILO – May person of interest na ang mga otoridad sa natabo nga pag-holdup sa negosyante sang livestock sa Barangay Buray, Oton, Iloilo.
Ang biktima amo si Alyas Rose, 28, residente sang nasambit nga barangay.
Sa interview sang Bombo Radyo kay Police Lieutenant Colonel Abner Jordan, Chief of Police sang Oton Municipal Police Station, iya ginapahayag nga tatlo ang mga suspek sa krimen.
Ini amo ang duha nga nag-hold up kag ang isa naman amo ang driver sang ila getaway vehicle.
Suno kay Jordan, isa pa lang ang ila person of interest kag tubtob subong, wala pa sila sang identity sang duha ka mga suspek.
Sa subong, napasa naman sa Regional Anti-Cybercrime Unit (RACU) 6 ang kopya sang Closed-circuit television (CCTV) camera nga amo ang mangin dako nga bulig agud matumod ang mga suspek kag ang plate number sang ila getaway vehicle.
Matandaan nga ginlambatan ang biktima sang duha ka lalaki, ginhawig ang e-bike sa kilid sang talamnan kag ginlampusan sang matig-a nga bagay ang iya ulo, kag ginkuha ang bag nga may unod nga P410,000.
-with a report from Bombo Phauline Pillora
