Naghatag sang inspirasyon ang istorya ang isa ka Ilongga nga wala nag-surrender sa pihak sang mga pagtilaw nga iya ginpangatubang antes naangkon ang kadalag-an bilang isa ka manunudlo sa Thailand.
Ini amo si Emelyn Faeldonia, sang Barangay Quinolpan, San Enrique, Iloilo.
Si Faeldonia ang nagtapos sa kurso nga Bachelor of Elementary Education with Specialization in Early Childhood Education sa West Visayas State University kag nangin kabahin sang Sea-Teacher Exchange Program sa Chiang Mai Rajabhat University sa Thailand.
Sa interview sang Bombo Radyo kay Faeldonia, iya ginpahayag nga wala nangin mahapos ang iya paglab-ot sa iya mga handom.
Nagkuha ini sang Licensure Examination for Teachers (LET) sang 2019, apang napaslawan ini nga makapasar.
Sa pihak sang kapaslawan sini, wala siya nag-surrender.
Sang 2023, liwat ini nga nagkuha sang LET kag sa amo nga tion, nakapasar na siya.
Gin-umpisahan sini ang iya career bilang preschool teacher sa College of St. John-Roxas, sa diin nagtudlo ini sang apat ka tuig, antes nagdesisyon nga magpadulong sa Thailand sang Hulyo 2023.
Bangud sa iya paghimakas, sang Agosto 2023, nabaton siya sa isa ka international school bilang manunudlo sang mga kabataan nga may special needs.
Sang Hunyo 2024, nabaton naman siya bilang preschool teacher sa isa ka Catholic school, sa diin siya nagatudlo tubtob subong.
