Gin-anunsyo sang ruling military government sa Myanmar nga magapatigayon ini sang temporaryo nga ceasefire batok sa armado nga oposisyon nga grupo.
Ini agud mahatagan sang ligwa ang pagpanghatag sang bulig, pag-umpisa sang rehabilitasyon, kag pagpangita sa mga biktima kasunod sang 7.7 magnitude nga linog nga natabo sang Byernes sang nagligad nga semana.
Base sa junta, magalawig ang ceasefire tubtub sa Abril 22.
Nagdangat na subong sa 3,003 ang patay kasunod sang linog apang ginalantaw nga magasaka pa ang numero ilabi na bangud ginatos pa ang missing. Yara naman sa 4,500 ang naisip nga nagkalasamaran.
Ginakahangaw-an man nga may matabo nga health crisis, ilabi na sa statement sang International Committee of the Red Cross nga wala na sang access ang mga tawo sa health care kag sa matinlo nga tubig.
Sa isa ka indi kinaandan nga hitabo, magabiya man sa Myanmar ang lider sang military nga si Min Aung Hlaing agud magpasakop sa summit sang South Asian countries sa Bangkok, Thailand.
Indi ini ordinaryo nga hitabo bangud wala masami gina-abi-abi ang amo nga heneral sa foreign trips ilabi na bangud gindagdagan ini sang Western sanctions kag subject sa imbestigasyon sang International Criminal Court halin sang natabo ang kudeta sadtong 2021.
