Patay gid ang 24 ka mga kabataan sa Bukavu City nga isa rebel-controlled area sa Democratic Republic of Congo, matapos ang nagluntad nga sunog sa duha ka eskwelahan kag sa ginabulubanta 300 ka mga balay.
Suno kay Dunia Masumbuko Bwenge, Vice Governor sang South Kivu province kun sa diin nalakip ang nasambit nga siudad, 19 sa mga kabataan ang babayi, samtang lima naman diri ang lalaki.
Pahayag sang mga awtoridad, nagapadayun pa ang ila imbestigasyon kun ano ukon sin-o ang yara sa likod sang nasambit nga insidente.
Sa subong, nahibaluan nga 29 na sa mga apektado ang padayun nga ginabulong kun sa diin 21 diri ang yara sa idalom sang intensive care unit matapos ang naagum sang mga ini nga pilas sa sunog.
