Nasamaran ang pila ka miyembro sang kapulisan sa tunga sang hublag-protesta sang pila ka grupo nga nagapamatok sa Pax Silica sa guwa sang isa ka hotel sa Taguig City.
Base sa mga litrato nga ginpagwa sang National Capital Region Police Office, may mga pilas ang pila sa mga pulis sa ila baba, butkon kag agtang.
Ginpahayag naman sang Philippine National Police (PNP) nga ang ila nga pagresponde sa protesta ang nagatuyo sa pagpugong sa dugang pa nga kagamo kag pagsiguro sa seguridad sang mga nagatambong sa Luzon Economic Corridor Investment Forum.
Suno kay Police General Jose Melencio C. Nartatez Jr., hepe sang PNP, nagpatuman sang maximum tolerance ang mga pulis sang nagpatigayon sang lightning rally ang mga nagprotesta sa hotel sa Bonifacio Global City.
Lima ka nagprotesta ang gindala sa kustodiya sang pulis matapos nga ginsiling nga nagpamilit sila sa pagsulod sa pribado nga lobby sang hotel kun sa diin ginahiwat ang economic forum bisan pa sa liwat-liwat nga pagpahanumdom sang kapulisan.
Posible nga pasakaan sang panumbungon ang lima ka gindala sa kustodiya lakip na ang alarms and scandals, resistance and disobedience, direct assault, tumults kag iban pa nga pagdisturbo sa public order, kag posible man nga paglapas sa Batas Pambansa Blg. 880 ukon Public Assembly Act of 1985.#
