Magluwas sa wildfire nga natabo sa Indonesia, naglupok naman subong ang Bulkan Anak Krakatau sa Sunda Strait sang nasambit nga pungsod.
Masobra sa 150,000 ka pasahero ang na-stranded matapos temporaryo nga ginsuspende sang mga awtoridad sa Indonesia ang operasyon sa walo ka airport.
Suno sa Transport Ministry, masobra 700 ka flight ang naapektuhan, lakip na ang mga byahe pakadto kag halin sa Singapore, Doha, Sydney, kag Kuala Lumpur.
Naglapta ang abo sang bulkan sa bahin sang Java kag Sumatra, nga nangin rason sang temporaryo nga pagsira sang pila ka airport.
Nag-umpisa sa pag-alburuto ang bulkan sang Biyernes sang gab-i kag ginsundan ini sang pagbuga sang lava.
Nagpahayag naman ang mga awtoridad nga wala sang tsunami warning may kaangtanan sa karon nga aktibidad sang bulkan.
Ginmanduan naman ang mga residente sa mga apektado nga lugar nga magpabilin sa sulod sang ila mga balay kag magsuksok sang face mask.
Ini agud malikawan ang peligro nga matuga sang abo sang bulkan.
Sa karon, padayon nga ginamonitor sang mga awtoridad ang sitwasyon kag ginapangabay ang mga airline nga madasig nga iproseso ang refund sang mga pasahero nga naapektuhan.
