Gin-ugyunan sang Department of Trade and Industry (DTI) ang pahayag sang Department of Agriculture (DA) nga mahimo pa makabenepisyo ang Pilipinas apisar sang 17% nga reciprocal tariff nga ipatuman sang United States government sa Pinoy products nga magasulod sa ila pungsod.
Suno kay Trade Secretary Maria Cristina Roque, indi hamak nga mas mataas ang taripa sa iban nga mga pungsod nga kaiping sang Pilipinas nga amo ang: Cambodia nga may 49%, Laos nga may 48%, Vietnam nga may 46%, Thailand nga may 47%, China nga may 34%, India nga may 27%, South Korea nga may 26%, kag Malaysia nga may 24%.
Halimbawa suno sa natungdan, opurtunidad ini nga hingalitan nga mapasaka ang exports sa niyog sa American market bangud mas mataas ang rate kun maghalin ang amo nga produkto sa Thailand.
“If you look at the clearer picture, we are still at an advantage,” suno sa tiglikom. “Mas mataas sila compared to us. Ang laki noon ah, that’s very big for us. We really need to use this opportunity para talagang i-push ang export na.”
Apang sa pihak sini, kinahanglan man suno kay Roque nga maninguha gid ang exporters nga sudlon ang markets.
“Sinabi ko rin sa kanila, I mean sa mga negosyante in general, let’s not put our eggs in one basket para (so that) just in case may ganitong nangyari, meron tayong ibang fallback,” dugang sang opisyal. “Hindi pwede na kumbaga lahat nasa isang basket, but we are at an advantage. In fact, after lumabas ‘yung 17%, tinawagan ko sila. We are still at an advantage.”
Matandaan nga amo man ini ang statement sang DA —nga mas pilion sang American importers ang Philippine goods sa baylo nga magkuha halin sa iban nga Southeast Asian countries.
Nahibaluan nga halin sang gin-anunsyo ni US President Donald Trump ang polisa sini sa taripa, masobra sa 50 ka mga pungsod ang nagkontak sa White House para nga maistoryahan ang negosyo suno sa top economic adviser ni Trump nga si US National Economic Council Director Kevin Hassett.#
