Nagtaliwan na ang beterana nga aktres kag national artist nga si Nora Aunor sa edad nga 71-anyos.
Ginkumpirma ini sang iya pamilya paagi sa iya anak nga si Ian de Leon nga naglaragway sa superstar bilang “heart of the family” kag “source of unconditional love, strength, and warmth.”
May separado man nga post ang anak sini nga si Matet de Leon nga nagapabutyag sang pagpalangga sa iya mommy kag nag-throwback sang ila mga laragway.
Sa inisyal nga impormasyon, ginbawian sang kabuhi ang aktres samtang nagapaidalom sa heart procedure isa ka bulan lamang antes ang iya ika-72 nga kaadlawan.
Ginbun-ag si Ate Guy bilang si Nora Cabaltera Villamayor sa Iriga City, Camarines Sur, kag sa iya pagsulod sa entertainment industry, ginbansagan siya nga “superstar” kag nahingadlan man nga National Artist for Film and Broadcast Arts sang 2022.
Pinaka-kilala siya sa iya iconic roles sa mga pelikula nga “Himala,” “Bona,”, “Minsa’y Isang Gamu-gamo”, “Bulaklak sa City Jail”, “The Flor Contemplacion Story”, “Tatlong Taong Walang Diyos”, kag iban pa. Lakip naman sa iya katapusan nga nangin proyekto amo ang “Mananambal” kag “Pieta”.
Magluwas sa pag-arte, kilala man siya sa pagkanta kag lakip sa iya bantog nga mga ambahanon amo ang “Pearly Shells” kag “Tiny Bubbles.”
Ginkasal siya anay sa aktor nga si Christopher de Leon sang 1975, apang sang ulihi nag-separar kag gin-annul ang kasal sang 1996. May yara sila sang biological child nga si Ian kag adopted children nga sanday Lotlot, Matet, Kiko, kag Kenneth.
