Malip-ot ang mga tinaga apang puno sang bugal nga gindumdom ni Alexie Brooks ang isa ka importante nga tawo sa iya kabuhi matapos nadag-an sini ang korona sa Miss Eco International 2025.
“Lola! I made it,” caption sang Ilongga beauty queen sa iya Facebook post kun sa diin may laragway si ‘Lola Basing’ kag yara naman sa background si Alexie kasunod sang iya pagdaog sa Egypt.
Indi lipod sa ihibalo sang publiko ang istorya ni Alexie — nga si Lola Basing amo ang nagpadaku kag nagtatap sa iya tubtub nga amat-amat sini nga nalab-ot ang iya mga handum.
Sa backstage interview sa Top 5 finalists, emosyonal man ang Pinay sang gin-share sini ang kabudlay sang nadula ang iya Lola nga nangin rason man suno sa iya kun ngaa nag-alang-alang siya kun magpadayon pa sa pag-intra sa kumpetisyon.
Septyembre 2024 sang napatay ang iya Lola — tion man nga nag-post si Brooks kun ano ini kasakit para sa iya.
“Today, I lost the person I loved more than anything, and the pain is unbearable. I’m at a loss for words. Lola, I loved you with everything I had, and now I feel completely shattered and unable to move on. I am heartbroken. God please,” pahayag sini anay.
Sa isa ka separado nga post, ginbutyag sini anay kun ano ka daku ang pagpalangga sini sa iya Lola nga amo suno sa iya ang iya pinakasuod nga abyan kag amo ang iya “greatest love.”
“Who would have thought it would be my final letter to you? I am hurt, grieving, and crying; I lost the only person I have ever loved so truly and wholeheartedly. You are my mother, my father, my best friend, my mentor, my master teacher, my greatest love. God knows how much I love you and how shattered and broken I am,” pahayag sang Filipino-American queen.
Pasado alas singko kaina sang aga (oras sa Pilipinas) nakuha ni Brooks ang ikatatlo nga Miss Eco International crown sang Pilipinas kasunod kanday Cynthia Thomalla sang 2018 kag Kathleen Paton sang 2022.
Nakuha man sang Ilongga ang Best in National Costume award paagi sa Philippine Eagle-inspired costume nga desinyo sang Ilonggo designer nga si Tata Pinuela.
(Photos: Alexie Brooks and Missosology)
