Apat ka tawo ang napatay samtang 88 naman ang nasamaran matapos magbunggo-anay ang duha ka tren sa Giza, sa Cairo, Egypt kahapon nga adlaw sang Domingo, Nobyembre 8, 2026.
Suno sa Railway Authority sang Egypt, nabunggo ang isa ka tren sa likod nga bahin sang isa pa ka tren kag bangod sang mabaskog nga pagbunggo-anay, nadiskaril ang pila ka bagon sang mga tren.
Suno sa Health Ministry, padayon ang pagbulong sa 88 ka mga pasahero nga nasamaran.
Samtang, ginmando ni Egyptian President Abdel Fattah al-Sisi ang gilayon nga imbestigasyon agud mahibaluan ang rason sang aksidente.
Nagapadayon man ang rescue operations sang mga awtoridad agud makuha ang mga naguba nga parte sang mga tren.
Nahibaluan nga ang lugar kun sa diin natabo ang aksidente ang gintunaan man sang pila ka aksidente sa tren sa kasaysayan sang Egypt.
Isa na diri ang sunog sa tren sang 2002 nga nagresulta sa pagkapatay sang masobra 370 ka tawo.
