Nag-file si Senador Erwin Tulfo sang hagna nga magaprotektar sa mga empleyado nga posible madulaan sang trabaho bangod sa paggamit sang Artificial Intelligence (AI) sang mga kompanya.
Paagi sa Senate Bill No. 2563, ginapanugyan nga indi gilayon makapahalin sang empleyado ang kompanya bangod lamang sa paggamit sang AI.
Kinahanglan may lehitimo nga rason ang kompanya kag mapamatud-an nga wala na sang iban nga paagi agud ipabilin pa ang empleyado.
Tinutuyo man sini nga hatagan ang mga apektado nga empleyado sang husto nga separation pay, retraining, kag kahigayunan nga masaylo sa iban nga obra.
Kinahanglan man nga napahibalo na gilayon kag may ara sang konsultasyon antes ipatuman ang pagpahalin sa ila.
Suno kay Tulfo, importante ang pag-uswag sang teknolohiya, apang dapat protektahan gihapon ang trabaho kag pangabuhian sang mga Pilipino kag sang ila pamilya.
