Ginalauman ni Senate Committee on Finance Vice Chairperson Senator Risa Hontiveros nga personal nga magatambong si Vice President Sara Duterte sa pagtalakay sang ginaproponer nga 2027 budget sang Office of the Vice President (OVP).
Suno kay Hontiveros, ginapaabot sang Senado nga ang tanan nga nagapamuno sang mga ahensya sang gobyerno magatambong sa mga budget hearing, halin sa committee deliberations tubtob sa plenary session.
Pahayag pa ni Hontiveros nga indi lamang kay si Duterte ginalauman nga magatambong kundi sa tanan nga nagapamuno sang mga ahensya sang gobyerno.
Dugang pa sang senador, mahibaluan sang Senado kun liwat naman nga indi makatambong ang Bise Presidente, bangod suno sa iya, indi ini maayo nga pamatasan para sa bisan sin-o nga nagapamuno sang ahensya, ilabi na gid sa isa ka mataas nga opisyal sang pungsod.
Madumduman nga sang bulan sang Oktubre, gilayon nga gin-aprubahan sang Senate Finance Subcommittee ang ginaproponer nga P785.2 milyon nga budget sang OVP para sa tuig 2027.
Nagdugay lamang sang 16 minutes ang amo nga hearing bangod wala didto si Duterte kag ang nagrepresentar lamang sa iya amo si OVP Chief of Staff Zuleika Lopez kag ang iban pa nga mga opisyal sang OVP.
Suno sa OVP, gamiton ang ginaproponer nga pondo agud mapadayon ang paghatag sang bulig kag serbisyo sa mga Pilipino sa bug-os nga pungsod.
