Gintawag nga “medyo tagilid” sang City Budget Officer (CBO) ang pagpasulod sang duha ka dalagku nga programa sa 2027 proposed budget ni Vice Mayor Lady Julie Grace Baronda matapos makita nga wala ini naga-angot sa legislative functions sang iya opisina kag wala pa sang bastante nga legal basis para hatagan sang pondo.
Suno kay City Budget Officer Viminale Capulso, tubtob subong pending pa ang proposed ordinance ni Baronda nga P10.25 milyon para sa institutionalization sang Libre Sakay para sa mga college students kag P2.9 milyon para sa pagpatukod sang three-digit centralized hotline.
Gintawag mismo ni Capulso nga “medyo tagilid” ang amo nga mga programa bangud indi suno sa iya sakop sang trabaho sang Sangguniang Panlungsod ang pag-implementar sang mga proyekto kag serbisyo nga dapat ginadumalahan sang executive department.
Pahayag ni Capulso, bisan sa planning stage pa lang sang Annual Investment Program, ginpaathag na sang City Budget Officer sa staff ni Baronda nga may mga proposed items nga wala naga-angot sa legislative mandate sang opisina.
Ginpunto niya nga suno sa Department of Budget and Management (DBM), legislative ang kinaiya sang trabaho sang Sanggunian, samtang ang pagpatuman sang mga programa kag proyekto responsibilidad sang executive branch.
Partikular nga ginkwestyon ni Capulso ang P10.25 milyon para sa Libre Sakay bangud indi na lamang paghimo sang ordinansa ang ginapanugyan nga buluhaton kundi nagalab-ot na sa implementation sang programa.
Sa bahin naman sang P2.9 milyon nga three-digit centralized hotline, ginpahayag niya nga wala pa sang legal basis ang paghatag sang pondo bangud wala pa maaprubahan ang proposed ordinance.
Sa pihak sini, ginpahayag ni Capulso nga wala man ginpabay-an ang legislative requirements sang opisina ni Baronda bangud may ginpain gihapon nga pondo para sa consultative meetings kag committee hearings.
Samtang, gikan sa P26.108 milyon nga Maintenance and Other Operating Expenses (MOOE) nga ginpangayo sang opisina ni Baronda, P4.8 billion lamang ang gin-grant para sa 2027.
Ginhalimbawa sang City Budget Officer ang actual nga paggasto sang opisina sa subong nga tuig, lakip na ang travel expenses nga gikan sa P500,000 nga allocation, P46,000 pa lamang ang nagasto as of June 2026.
Bangud sini, P200,000 na lamang ang ginpain para sa travel expenses sa 2027.
Ginpabutyag man ni Capulso nga indi lamang ang opisina ni Baronda ang nakabatyag sang pagpanubo sang budget kundi halos tanan nga opisina kag departamento sang City Hall, bangud 67.5 porsyento sang kabug-usan nga pondo sang siyudad ang na-alokar sa statutory obligations.
Ang nabilin nga 32.5 porsyento amo ang ginadistribute sa nagkalain-lain nga opisina suno sa ila kinahanglanon.
Sa pihak sang mga pagpaathag sang City Budget Officer, natalana pa nga maghatag sang sabat si Baronda agud maathag ang iya panindugan sa mga ginkwestyon nga programa kag sa pagpanubo sang budget sang iya opisina.
Text by: Bombo Cyrene A. Nasis
