Ginkumpirma sang doktor sa Vatican nga napatay si Pope Francis bangud sa stroke kag sa irreversible heart failure.
Gin-release ang death certificate pasado alas dos subong nga kaagahon oras sa Pilipinas.
Suno kay Professor Andrea Arcangeli, director sang Directorate of Health and Hygiene sa Vatican City State, na-coma pa ang 88-anyos nga Santo Papa antes ini ginbawian sang kabuhi eksakto 7:30 sa Lunes sang aga oras sa Vatican.
Ginsulat man sa medical report ang iban nga balatian nga ginsuprer anay sang Pope kaangay sang history sini sa acute respiratory failure nga tuga sang multimicrobial bilateral pneumonia, multiple bronchiectases, high blood pressure, kag type II diabetes.
Nakumpirma ang iya kamatayon paagi sa electrocardiographic thanatography.
Base pa kay Professor Arcangeli sa dokumento: “I hereby declare that the causes of death, to the best of my knowledge and judgment, are as stated above.”
Ginbawian sang kabuhi ang Pope isa ka adlaw matapos ini nagpakita pa sa publiko samtang ginabasa sang isa ka Cardinal ang iya ginpreparar nga Urbi et Orbi (to the city, to the world) message kadungan sang Easter Sunday.
Sang amo man nga adlaw, nagsulod pa ang Pope sa St. Peter’s Square sakay sa popemobile kag gintinguhaan sini nga maalsa ang iya kamot agud tamyawon ang mga tumuluo. Amo man ini ang tion nga nakahatag siya sang special blessing halin sang Christmas, bangud kun matandaan, 38 ka adlaw siya nga na-ospital bangud sa double pneumonia.
Posible suno sa Vatican nga halinon sa St. Peter’s Basilica ang lungon sang Pope sa Myerkules sang aga agud nga makita man ini sang mga tumuluo.
Wala pa sang petsa nga nahatag kun san-o ang lubong, apang suno sa Vatican, lauman nga matabo ini sa tunga-tunga sang Byernes kag Domingo. Natalana pa nga mag-sapol ang grupo sang mga cardinal sa Martes (oras sa Vatican) agud nga maplastar ang petsa sang lubong.#
Photo courtesy: Roy Lagarde/CBCP News
