Gin-aresto ang isa ka lalaki nga souvenir maker matapos nakuhaan sang marijuana sa Roro Port, Brgy. Hoskyn, Jordan Guimaras.
Ini amo si alyas Wil, 21, solterito kag residente sang Compania, Fundidor, Molo, Iloilo City.
Sa interview sa Bombo Radyo kay Police Captain Kenz Bacongallo, Deputy Chief of Police sang Jordan Municipal Police Station, iya ginpahayag nga samtang nagapatigayon sila sang random inspection, nakita nila sa sulod sang bag sang suspek ang ginapatihan nga marijuana.
Suno kay Bacongallo, gin-ako ni Wil nga nagagamit siya sang droga bangud ini ang makabulig sa iya malipatan ang iya mga problema.
Narecover sa iya posisyon ang aluminum canister nga may unod nga dahon kag liso sang Marijuana nga ginabulubanta nagabug-at sang 2 grams nga nagabili sang P374.00.
Sa subong, yara na sa kustodiya sang Jordan Municipal Police Station kag nagapangatubang sang kaso nga paglapas sang Section 11 kag 12, Article II sang Republic Act No. 9165 ukon Comprehensive Dangerous Drugs Act of 2002.
