Nagsungka na sa kapulisan ang driver sang salakyan nga nag hit and run sa duha ka sakay sang motorsiklo sa Commission Civil Street, Brgy. Fatima, Jaro, Iloilo City sang Sabado.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office (ICPO), iya ginpahayag nga may naghatag sang impormasyon sa mga kapulisan natuhoy sa driver nga luyag niya nga mag-surrender kaupod ang iya abogado sa mga kapulisan kag handa nga mag-atubang sa mga biktima.
Suno kay Sangrines, nahibaluan man nga lain ang tag-iya sang salakyan nga iya ginmaneho bangud na-identify ini pinaagi sa kuha sang Closed-circuit television (CCTV) kag nagaguwa nga indi siya ang tag-iya.
Dugang ni Sangrines, nagtuad ang driver nga bangud sa tuman ka kulba nahimo niya nga magpalagyo sa tion sang pagkabunggo sini.
Sa subong, ginapreparar na sang Traffic Enforcement Unit (TEU) sang ICPO ang kaso nga ipagapasaka batok sa driver.
Nahibaluan nga nagaguwa sa imbestigasyon sang otoridad nga nang-agaw sang linya ang isa ka Sports Utility Vehicle ukon SUV rason nga nabungguan sini ang motorsiklo nga ginamaneho ni Ariel Habal, samtang angkas naman sini si Eric Paul Gacita.
Padulong kontani sa banwa sang Pavia ang motorsiklo samtang padulong naman sa La Paz ang SUV.
